Журналісты выконваюць заданні са спісу «100 рэчаў, якія варта зрабіць у Беларусі»
На мінулым тыдні пашанцавала паехаць у сталіцу.
Прызнаюся, у чарзе заданняў было нямала прапаноў, што зрабіць у Мінску. Але ў маім насычаным графіку хапіла часу толькі на шопінг.
Пакуль хойніцкая дэлегацыя выбірала сабе абноўкі ў магазіне «Мерч ад Першага», заўважыла яшчэ адзін яркі астравок у гандлёвым цэнтры. Там выстаўлены самыя розныя тавары з беларускай сімволікай. Больш за ўсё спадабалася брошка ў выглядзе васілька. Якая прыгажосць! Але кошт крыху працвярозіў – амаль 40 рублёў. Яшчэ пашукаю.
Ручнікі, сурвэткі, посуд і адзенне – на ўсім красаваліся арнаменты, васількі і дэвізы. Побач стаялі лялькі ў нацыянальных уборах, ляжалі капелюшы, разнастайныя магніцікі. Зразумела, што адысці ад прылаўка без пакупкі проста немагчыма.
Мне так і хацелася выбраць нешта, чым бы я карысталася як мага часцей, каб любавацца на прыгожы беларускі ўзор. Што ж гэта можа быць? Так! Набуду сабе шкарпэткі! Беленькія, з тонкім малюнкам наверсе. І цана прываблівала – танней за 4 рублі. Выбрала з раслінным узорам – доўгая галінка з чырвонымі ягадкамі.
Як высветлілася, кожны малюнак беларускага арнаменту нясе свой сакральны сэнс. Мае ягадкі, напрыклад, сімвалізуюць багаты ўраджай. Апранаць адзенне з такім узорам – прыцягваць удачу і шчаслівы лёс, багацце, дабрабыт.
Нашто ж я берагу сталічны сувенір?! Трэба хутчэй надзяваць.
Алеся ЯЧЫЧЭНКА.
