Як кажа пляменніца пісьменніка Івана Мележа Лілія Краўчанка, што так любіць сваю малую радзіму, так паважаць, цаніць, любіць глінішчукоў, як гэта ўмеў рабіць наш славуты зямляк, могуць не ўсе.
А інакш не ўдаўся б яму знакаміты твор «Людзі на балоце», аб якім гаворыць увесь свет. Менавіта ў ім ён так душэўна апісаў каханне Ганны і Васіля, пазнаёміў чытачоў са шчырасцю і гумарам сяльчан, якія мараць аб шчасці і светлай будучыні.
Сёння мы разам адзначылі 102 гады з дня нараджэння нашага знакамітага земляка Івана Мележа. Аграгарадок Глінішча стаў месцам прыцягнення людзей: тут гучалі добрыя словы, песні (у тым ліку яго любімая «У канцы грэблі шумяць вербы»), праніклівыя вершы, былі нават танцы. Усклалі кветкі да помніка каля Дома-музея Івана Мележа.
Госці святочнага мерапрыемства акунуліся ў літаратурную творчасць імянінніка з дапамогай фотаздымкаў аўтара і асабістых рэчаў народнага пісьменніка Беларусі. Артысты мастацкай самадзейнасці раёна дарылі гледачам канцэртныя нумары. Маленькія землякі таксама аддзячылі кампазіцыямі.
Удзел у мерапрыемствах прынялі старшыня раённага Савета дэпутатаў Галіна Бондар, намеснік старшыні райвыканкама Сяргей Кушнер, супрацоўнікі пагранзаставы «Хойнікі», члены Маладзёжнага парламента і аднавяскоўцы.
Як адзначыла Галіна Віктараўна, мы ўсе павінны памятаць Івана Мележа, чалавека, які праславіў Хойнікшчыну. Плануецца пасмяротна таленавітаму земляку прысвоіць званне «Ганаровы грамадзянін Хойніцкага раёна».
Вікторыя МАРОЗ.
Фота аўтара.
