Старшыня аблвыканкама, удзельнік пятага Усебеларускага народнага сходу Уладзімір Андрэевіч Дворнік у Хойніках сустрэўся з былымі кіраўнікамі раёнаў вобласці.
Напярэдадні сустрэчы старшыня Хойніцкага райвыканкама Аляксандр Іванавіч Ціток і яго намеснік Жанна Мікалаеўна Чарняўская азнаёмілі гасцей з патэнцыялам нашага раёна.
Усе пабывалі на заводзе жалезабетонных вырабаў, які за апошнія гады ў літаральным сэнсе набыў другое жыццё. У яго мадэрнізацыю ўкладзена 78 мільярдаў рублёў! Нават па знешняму выгляду відаць, што гэта сучаснае прадпрыемства, а зайшоўшы ўнутр упэўніваешся, што з самымі найноўшымі тэхналогіямі. Сапраўды ўразіла гасцей новая лінія па выпуску сценавых панеляў, якая дазволіла мінімізаваць ручную працу. Сёння завод выпускае танную і якасную прадукцыю, пастаянна пашыраючы яе асартымент, таму і праблем са збытам не ўзнікае. Вы ўжо маглі заўважыць, што у Хойніках, каля «Еўраопта» пачалося будаўніцтва новага дома. Дык вось, яго будзе ўзводзіць завод жалезабетонных вырабаў, выкарыстоўваючы выключна свае матэрыялы.
Нагадаем, што цяпер прадпрыемства адносіцца да Мазырскага домабудаўнічага камбіната, які выдатна зарэкамендаваў сябе на будаўнічым рынку, таму падрымка ёсць істотная. Варта адзначыць і тое, што кошт аднаго квадратнага метра жылля ў гэтай вышэйстаячай арганізацыі самы танны ў рэспубліцы. Да таго ж, нашы панелі добрыя тым, што не патрабуць дадатковай аддзелкі – яны роўныя і гладкія, таму прама на іх можна клеіць шпалеры. Завадчане пастаянна працуюць над зніжэннем сабекошту прадукцыі. Нядаўна ў эксплуатацыю была ўведзена новая высокатэхналагічная кампактная кацельня для атрымання пары. Розніца са старой, канешне, адчувальная: у 10 разоў зменшыліся страты на электраэнергію і ў восем разоў на газ! Многае на заводзе робіцца для паляпшэння ўмоў працы, упэўнена расце заработная плата – у выніку цяпер тут ужо няма цякучкі кадраў.
Мікалай Аляксандравіч Мязенка:
– Я раней, калі працаваў намеснікам начальніка аблсельгасхарчу, па рабоце часта бываў у Хойніках. Добра памятаю гэты завод, ён гадоў дзесяць назад не каціраваўся, а цяпер становішча змянілася капітальна, я ўражаны. Вы сапраўды можаце канкурыраваць на будаўнічым рынку, тым больш што вырабляеце ўсё, пачынаючы ад фундамента і заканчваючы агароджай. Упэўнены, што перспектывы тут выдатныя.
Затым для ўдзельнікаў мерапрыемства была арганізавана экскурсія на Палескі вытворчы ўчастак ААТ «Мілкавіта». Асаблівую цікавасць гасцей выклікаў уведзены летась у эксплуатацыю цэх па сушцы сыроваткі. Гэта сапраўды ўнікальны праект, аналагаў якому няма ва ўсім СНД. Тут магчыма пераапрацоўваць да 500 тон сыроваткі ў суткі! Многія былыя кіраўнікі ўзгадвалі, што аварыя на ЧАЭС сур’ёзна «падкасіла» прадпрыемства, і цяжка было паверыць, што яно зможа так ўзняцца. Але мы пераўзышлі ўсе чаканні. Аб чым сведчаць і лічбы: рэнтабельнасць ад выпуску сыроваткі складае 22 працэнты, ад сыроў – да 33. Адметна і тое, што большасць прадукцыі ідзе на экспарт.
Вольга Мікалаеўна Кашавенка:
– Здавалася б невялікі раённы цэнтр, а вытворчасць наладжана на сусветным узроўні. Цудоўна, што ёсць такі прагрэс у маленькіх гарадах. Уражвае і тое, насколькі сёння запатрабавана ваша прадукцыя, у тым ліку за мяжой. Хаця яно і зразумела – якасць выдатная. Мяне вельмі захапіў высокі ўзровень культуры на Палескім вытворчым участку, яна адчуваецца ва ўсім. А яшчэ відавочна, што ў вас сапраўдны дыктат тэхналогіі. У Хойніках створаны ўсе ўмовы для таго, каб тут замацоўвалася моладзь, нараджаліся і раслі дзеці. І гэта не можа не радаваць.
Далей па праграме было ўскладанне вянкоў і кветак да помніка Смутку. Усе прыехаўшыя тым ці іншым чынам былі звязаны з ліквідацыяй наступстваў аварыі на ЧАЭС. Гэта падзея пакінула глыбокі след у сэрцы кожнага з іх, таму госці проста не маглі не аддаць дадіну памяці.
Генадзій Лукіч Гаварушка:
– Прайшло трыццаць гадоў з таго самага трагічнага 1986-га. Але мы не здаліся і не зламаліся. Хойнікі і вашы жыхары выдатнае таму сведчанне. Вы з аптымізмам працягваеце жыць і ствараць. Вельмі прыгожы, чысты горад – адчуваецца, што тут жывуць сапраўдныя гаспадары, якія любяць свой край. Але больш за ўсё мне спадабаўся сам Аляксандр Іванавіч Ціток, ваш старшыня. Чалавек, які «гарыць» справай, усё ведае, ва ўсё ўнікае і працуе на вынік. Я бачыў, з якім энтузіязмам ён расказваў нам пра тое, як развіваецца раён – па ўсім відаць, што ён прыкладае максімум намаганняў, каб хайнічанам жылося лепш.
Потым госці пабывалі на сельскагаспадарчых аб’ектах. У канцы 2014 года на новы малочна-таварны комплекс «Пудакоў» прыбыла першая партыя цялушак. А ўсяго праз год ферма ўжо была ўкамплектавана на сто працэнтаў – і, што важна, выключна «сваім» пагалоўем. Нагадаем, што комплекс разлічаны на тысячу галоў, з якіх 600 – дойны статак. У мінулым годзе тут надаілі звыш шасці тысяч літраў малака на карову. А галоўнае, што амаль ўсё яно было гатункам «экстра». Сёння тут атрымліваюць па дваццаць літраў малака ад каровы ў суткі.
Іван Іванавіч Петухоў:
– У сельскай гаспадарцы ў вас сапраўдны прарыў. У наш час такія фермы маглі толькі сніцца. Усё аўтаматызавана, палегчана праца работнікаў, для жывёлы створаны выдатныя ўмовы. У вашым раёне стаўка робіцца на развіццё вытворчасці – і гэта вельмі правільна, вы ідзеце па належнаму шляху, таму і атрымліваеце вынікі. А ваш Аляксандр Іванавіч – гэта наогул цуда-чалавек! У яго столькі энергіі, ён глядзіць наперад, ставіць мэты – і дабіваецца іх.
Яшчэ ўдзельнікі сустрэчы заехалі на Стралічаўскую ферму, дзе пабудаваны тры ўнікальныя хлявы-тысячнікі, якімі захапляецца губернатар вобласці. Памяшканні для ўтрымання жывёлы былі ўжо развалены, патрэбна было іх зносіць, але дзякуючы правільным рашэнням кіраўніцтва раёна,іх выратавалі і рэканструявалі. Цяпер гэта вялікія, прасторныя хлявы для адкорму буйной рагатай жывёлы. На адну карову тут прадугледжана 15 квадратных метраў (норма – ад дзесяці і вышэй) – вось якое раздолле! Да таго ж, паміж двумя памяшканнямі пабудавалі новы даільна-малочны блок – такім чынам разваліны ператварыліся ў самы сучасны комплекс.
Цімафей Іванавіч Глушакоў:
– Я многа дзе бываў і многае бачыў, таму мяне здзівіць цяжка, але вашаму раёну гэта ўдаецца. Я ў шчырым захапленні, кожны раз, калі тут бываю, здзіўляюся, як кіраўніцтву ўсё гэта ўдаецца. Жадаю вам далейшага развіцця і росквіту.
Пасля паездкі па раёну ўдзельнікі мерапрыемства пабывалі ў раённым краязнаўчым музеі, дзе для іх была арганізавана сустрэча са старшынёй аблвыканкама У.А. Дворнікам. Размова за круглым сталом атрымалася надзвычай цёплай. Былыя старшыні райвыканкамаў, першыя сакратары райкамаў партыі павіншавалі губернатара з атрыманнем высокай ўзнагароды – Ордэна Айчыны ІІІ ступені і нават падрыхтавалі яму вершаваныя віншаванні і словы падзякі за адданую работу на карысць нашай вобласці. Затым Уладзімір Андрэевіч падрабязна расказаў аб развіцці Гомельшчыны. Ён закрануў усе тэмы: сельскую гаспадарку, прамысловасць, адукацыю, медыцыну і інш.
Па многіх паказчыках мы выраслі за апошнюю пяцігодку, таму нам сапраўды ёсць чым ганарыцца, але яшчэ больш прадстаіць зрабіць у будучым. У.А. Дворнік заўважыў, што цяпер, дзякуючы клопату дзяржавы і адраджэнню пацярпелых ад катастрофы на ЧАЭС тэрыторый, многія забылі пра тое, што на Гомельшчыне ёсць чарнобыльскія раёны. З кожным годам усё больш прыгажэюць нашы гарады, у прыватнасці Хойнікі. Старшыня аблвыканкама падкрэсліў, што галоўнае – развіваць вытворчасць і прыцягнуць бізнес у вёску. Павышэнне дабрабыту грамадзян з’яўляецца прыярытэтам у дзейнасці органаў кіравання Гомельскай вобласці. Дарэчы, адметна, што найбольш высокі ўзровень нараджальнасці ў бягучым годзе адзначаны менавіта ў чарнобыльскіх раёнах – Чачэрскім і Хойніцкім.
Удзельнікі размовы, а гэта людзі, якія маюць велізарны вопыт у партыйнай і гаспадарчай дзейнасці на розных пасадах, выказалі падтрымку таго курсу, што праводзіцца ў нашай вобласці.
Тэкст і фота Наталлі ЧЭКАН.
