Пасля канцэрта ў раённым Доме культуры з нагоды прафесіянальнага свята культработнікаў упэўнілася, што няма больш удзячных гледачоў, чым віноўнікі гэтага мерапрыемства.
Частыя наведвальнікі мясцовых святочных мерапрыемстваў пацвердзяць, што расштурхаць хайнічан, запрасіць іх спяваць разам ці танцаваць практычна немагчыма. За гэта спаборнічаюць і артысты мясцовай самадзейнасці, і прыезджыя зоркі эстрады. У апошніх дзе-нідзе нават атрымлваецца запаліць агеньчык зацікаўленасці. Але ж вернемся да нашых работнікаў культуры.
На прыгожа ўбранай сцэне на мінулым тыдні гучалі шматлікія віншаванні. Словы ўдзячнасці выказала намеснік старшыні райвыканкама Ж.М. Чарняўская, падзякавала сваім калегам начальнік аддзела ідэалагічнай работы, культуры і па справах моладзі райвыканкама Л.В. Няволіна. Лепшым з лепшых уручылі заслужаныя падзякі і граматы разам з падарункамі. З залы ў гэты час даносіліся гучныя авацыі.
Каб зрабіць вечар па-сапраўднаму святочным, калектыву культработнікаў свой падарунак у выглядзе невялікага канцэрта зрабілі артысты мастацкай самадзейнасці запаведніка. У час выступленняў гледачы падтрымлівалі артыстаў-аматараў, спявалі разам з імі, не чакаючы настойлівага закліку з падмосткаў.
Звычайна падзяку адрасуюць тым, хто працаваў на сцэне і дарыў станоўчыя эмоцыі. На гэты раз хочацца выказаць шчырую падзяку і работнікам культурнай сферы, якія на кароткае імгненне сталі гледачамі. Такую аудыторыю – ды на кожнае свята!
Алеся ЯЧЫЧЭНКА.
Фота аўтара.
