На базе інфекцыйнага аддзялення цэнтральнай раённай бальніцы адкрыты два ложкі па зняццю сімптомаў алкагольнай залежнасці на платнай аснове. Аб працэдуры аказання гэтай паслугі расказвае загадчык аддзялення, урач С.А. Хаванскі:
– Кожнага чалавека, які пажадаў атрымаць паслугу, аглядвае ўрач-псіхатэрапеўт-нарколаг і робіць неабходныя назначэнні, якія выконваюцца персаналам аддзялення. Калі стан пацыента пагаршаецца, яго накіроўваюць на лячэнне ў Гомель – у наркалагічны дыспансер або псіхіятрычную бальніцу. Калі ў паступіўшага пацыента выяўлены ўскладненні ў здароўі, напрыклад, паталогія сардэчна-сасудзістай сістэмы, запаленне лёгкіх, сутаргавы сіндром, паслуга аказваецца бясплатна.
Пры ўзнікненні канфліктнай сітуацыі, калі пацыент гаворыць, што ён алкаголік, а алкагалізм – гэта хвароба і яго трэба лячыць бясплатна, выдаецца накіраванне ў абласны наркалагічны дыспансер.
За месяц у сярэднім жадаюць купіраваць алкагольны сіндром –выйсці з запою 15 чалавек, ёсць група пацыентаў, якія за два гады дзейнасці гэтай паслугі пабывалі ў нас па 3-4 разы.
Прыняць чалавека можам у любы дзень тыдня і час сутак. Абавязковая ўмова – перадаплата паслугі. Кошт яе залежыць ад таго, колькі дзён – два або тры – пацыент будзе знаходзіцца ў медустанове, з харчаваннем або без. У сярэднім сума складае 70 тыс. рублёў.
