Шыццё, вязанне, вышыванне, вырабы з саломкі, бісерапляценне, дэкупаж, квілінг, скрапбукінг – столькі ўсяго ўмеюць работнікі раённага Дома рамёстваў! Іх фантазіі няма межаў, і кожны раз яны здзіўляюць усё больш і больш. На днях мы зазірнулі да майстроў у госці, каб паглядзець на іх навінкі. А іх тут аказалася шмат.
Хтосьці яшчэ знаходзіцца ў навагоднім настроі і стварае елачкі з нітак, а нехта ўжо пачаў рыхтавацца да 8 Сакавіка і вырабляе цудоўныя скрыначкі. Ёсць і новыя лялькі-абярэгі, і тапіарый, і эксклюзіўныя падарункавыя пакецікі. І нават нататнікі ў джынсавай вокладцы і арыгінальныя «лабутэны» з паперы. Сярод навінак шмат драўляных вырабаў – раздзелачныя дошкі, лыжкі, статуэткі. 
Разьбой па дрэву тут займаецца таленавіты малады спецыяліст Ігар Шаўчэнка. У Доме рамёстваў ён працуе з лета 2016-га пасля заканчэння Гомельскага каледжа народных мастацкіх промыслаў.
Трэці месяц на пасадзе дырэктара Вольга Аляксандраўна Зелянкоўская. Яна закончыла Гомельскае швейнае вучылішча, потым Мазырскі дзяржаўны ўніверсітэт па спецыяльнасці «абслугоўваючая праца».
Да гэтага была кіраўніком гуртковай работы ў цэнтры творчасці дзяцей і моладзі. Рукадзелле палюбіла яшчэ са школьных урокаў працы ў настаўніка СШ № 4 (цяпер гімназіі г. Хойнікі) Л.І. Мароз. Цяпер ні дня не можа без творчасці, пастаянна нешта майструе. Вяжа вопратку для сваіх дзяцей, упрыгожвае хатні інтэр’ер, робіць эксклюзіўныя работы на падарунак родным і блізкім.
Самы вопытны работнік Дома рамёстваў – Вольга Данілаўна Шляхценка, яна тут працуе ўжо амаль 14 гадоў. Яе «залатым» рукам пад сілу ўсё, нават самыя неверагодныя ідэі.
Дарэчы, вырабы работнікаў Дома рамёстваў цяпер можна набыць у раённым краязнаўчым музеі.
Тэкст і фота Наталлі ЧЭКАН.
