Смачным па праву можна назваць раённы конкурс «Лепшы повар дашкольнай установы адукацыі», прайшоўшы ў мінулую суботу ў гімназіі г. Хойнікі. Сырнікі, наліснікі, фруктовыя кампоты і разнастайная выпечка… У якасці гастранамічных прапаноў – усё, чаго душа пажадае. І, як вядома, усё лепшае – дзецям.
На кулінарны паядынак прыйшлі повары пяці гарадскіх дзіцячых садкоў – ясляў-сада № 1, 2, 4, санаторнага ясляў-сада і дашкольнага цэнтра развіцця дзіцяці. Конкурс – добрая нагода для прафесійных хойніцкіх кулінараў прадэманстраваць, на што яны здольныя.
Ацэньвалі вынікі работы повараў як прафесіянальныя тэхнолагі, так і прадстаўнікі аддзела адукацыі, спорту і турызму райвыканкама разам з педагогамі.
Канкурсантак правяралі на крэатыўнасць, творчы патэнцыял і непасрэдна поварскія якасці. У прывітанні дзяўчаты ў вершах і прозе расказвалі пра свой прафесійны шлях, ім дапамагалі калектывы дзіцячых садкоў. 
Напрыклад, повару Алене Лабадзе асісціравалі самыя маленькія выхаванцы дзіцячага цэнтра развіцця дзіцяці разам з выхавальніцамі. Кулінару Алене Аніскавец з садка № 1 падпявалі толькі дарослыя, як 
Святлане Данчанка з санаторнага ясляў-сада з першага гарадскога сада. Людміла Тагай з ясляў-сада № 2 пачаставала прысутных фірмовай стравай – рулетам з сухафруктамі. А вось разам з поварам Таццянай Кур’яновіч выступілі іншапланецяне! Вядома, казачныя, ролі якіх выканалі артысты дуэта «Калейдаскоп забаў».
У наступным іспыце патрэбна было хутка і незвычайна прэзентаваць салат з садавіны. Набор прадуктаў вырашаўся выпадкова. Усе годна справіліся з заданнем – кожная канкурсантка пераканала, што можа прыгатаваць смакату з самых простых прадуктаў.
Самым чаканым, асабліва для маленькіх балельшчыкаў, быў конкурс дэгустацыі. Усе без выключэння добра пастараліся і шчодра пачаставалі гасцей разнастайнымі сласцёнікамі.
Усе ўдзельніцы атрымалі граматы за ўдзел, кветкі і падарункавыя сертыфікаты на працэдуры ад спонсара – касметычнага кабінета «Эдэм». Трэцяе месца заняла повар Святлана Данчанка з санаторнага ясляў-сада, другое – Алена Лабада з дашкольнага цэнтра развіцця дзіцяці. Першае месца раённага конкурсу заняла повар дзіцячага ясляў-сада № 4 Таццяна Кур’яновіч.
Тэкст і фота Алесі ЯЧЫЧЭНКА.
