Цуды пад Новы год

Упершыню прайшла дабрачынная акцыя «Нашы сэрцы – хворым дзецям», якую арганізавалі работнікі ўстаноў дашкольнай адукацыі раёна.

Работнікі ўсіх гарадскіх дзіцячых садоў у касцюмах казачных герояў, добра вядомых і любімых дзецьмі, – Дзеда Мароза, Снягурачкі, ката Базіліа і лісы Алісы, а таксама зусім не страшнага, а, хутчэй, абаяльнага, Карабаса Барабаса – стварылі невялічкі канцэрт у фае дзіцячага аддзялення раённай бальніцы. Да дзяцей завіталі два Снегавікі. На казачны спектакль запрасілі не толькі хворых дзяцей і іх матуль, але і медыцынскі персанал аддзялення.

Казачныя героі вадзілі з гледачамі святочныя карагоды вакол упрыгожаннай елачкі, правялі некалькі вясёлых конкурсаў, а таксама падарылі дзецям навагоднія падарункі: цацкі і наборы для малявання. Парадаваць дзяцей – заўсёды прыемна, тым больш перад Новым годам. Акрамя таго, госці пажадалі дзецям, каб яны хутчэй папраўляліся і ніколі не траплялі ў бальніцу.

Алеся ЯЧЫЧЭНКА.