У гэтым годзе ўпраўленнем сельскай гаспадаркі і харчавання райвыканкама, райкамам прафсаюза работнікаў аграпрамысловага комплексу штомесячна, а таксама паквартальна і за паўгоддзе падводзяцца вынікі працоўнага спаборніцтва жывёлаводаў.
Пераможцам у індывідуальным саперніцтве ўручаюцца адпаведныя граматы і прыемны грашовы дадатак да іх (адна базавая велічыня) ад гаспадаркі. Калі прагартаць сёлетнюю падшыўку нашай газеты за прайшоўшыя месяцы, можна выявіць, што ў сакавіку, красавіку, а таксама ў чэрвені пераможцай сярод аператараў машыннага даення кароў станавілася Святлана Аляксандраўна Свірыдава з эксперыментальнай базы «Стралічава». Не стаў выключэннем і мінулы месяц ліпень – сярэдні надой ад каровы ў групе С.А. Свірыдавай склаў 3405 кілаграмаў. А гэта зноў-такі лепшы паказчык у раёне, і працоўныя перамогі Святланы Аляксандраўны ўжо паступова становяцца ганаровай традыцыяй.
У эксперыментальнай базе «Стралічава» яна з 1998 года. Па першым часе працавала на ўздапаможнай вытворчасці – на мясцовым спіртзаводзе, а потым, з пачаткам 2000-х гадоў, жанчына перайшла ў жывёлагадоўлю.
Свой працоўны стаж жывёлавода Святлана Аляксандраўна пачынала на ферме ў Губарэвічах, а потым яе перавялі на малочнатаварную ферму № 1 у Стралічаве.
Сціплая і нешматслоўная жанчына паўсюдна вызначалася працавітасцю, адказнасцю ў адносінах да выканання сваіх абавязкаў. Таму яе заўсёды цаніла і паважала кіраўніцтва гаспадаркі, а таксама таварышы па рабоце і на Губарэвіцкай МТФ, і на Стралічаўскай ферме № 1.
З лютага гэтага года Святлане Аляксандраўне прапанавалі перайсці на новы жывёлагадоўчы комплекс у Стралічаве. Падумала-падумала, згадзілася, а сёння ўжо не шкадуе аб гэтым выбары. Калектыў на ферме падабраўся неблагі, працуюць тут 4 асноўныя даяркі і адна падменная. Пытаюся ў Святланы Аляксандраўны аб тым, як паўплываў тэхнічны прагрэс на ўмовы яе работы:
– Канешне ж, нельга параўноўваць комплекс і звычайную ферму: на комплексе намнога менш ручной працы, – такім быў адказ С.А. Свірыдавай.
Аднак праз паўзу Святлана Аляксандраўна дадала:
– І ўсё ж вынікі работы кожнага чалавека залежаць ад яго адносін да даручанай справы. Якія б дасягненні нам не прапаноўвалі вучоныя, але ж і тэхніка ламаецца ў няўмелых руках, і самыя найноўшыя сістэмы не дадуць эфекту без захавання элементарнай працоўнай дысцыпліны.
А вось аб прафесійных якасцях гэтай жанчыны красамоўна выказаўся начальнік Стралічаўскага жывёлагадоўчага комплексу Сяргей Аляксандравіч Хутарцоў:
– Выдатная работніца, добрасумленна ставіцца да сваіх абавязкаў, якасна выконвае сваю работу. Думаю, што маю права так казаць, бо ведаю Святлану Аляксандраўну не адзін год па сумеснай рабоце.
Віктар НАЗАРАНКА.
