У якасці прыза – паездка ў Глыбокае

Вучаніца 10 класа Судкоўскай сярэдняй школы Святлана Пархоменка прыняла ўдзел у абласным конкурсе рытарычнага майстэрства «Гавары са мной па-беларуску», прысвечаным 100-годдзю з дня нараджэння Максіма Танка.

Хаця ў пераможцы конкурсу не выйшла, але вельмі задаволена прызам – паездкай у горад Глыбокае Віцебскай вобласці, які быў сёлета гаспадаром Дня беларускага пісьменства. Туды Святлана, адзіная з нашага раёна, выязджала ў саставе групы прызёраў конкурсу чытальнікаў з усёй Гомельскай вобласці.

Вярнулася дамоў поўная самых багатых уражанняў, якімі падзялілася з настаўнікамі і вучнямі школы. Дэлегацыя школьнай моладзі папрысутнічала на ўрачыстым адкрыцці  свята, юнакі і дзяўчаты прынялі ўдзел у канцэртах, адкрылі для сябе многа новага і цікавага і проста адпачывалі, атрымліваючы  асалоду ад атмасферы ўсенароднага гуляння. Азнаёміліся з нацыянальным каларытам, асаблівасцямі народнай кухні і мастацтвам суседніх краін. Правялі вольны час у горадзе майстроў, дзе прапаноўваліся арыгінальныя гліняныя і вырабы з саломкі, якія можна было набыць у якасці сувеніраў.

Трыумфальна-радасны напеў шматлікіх званоў гучаў высока над зямлёй, а паўсюдна ў Глыбокім шумела-бегла свята. Яно надоўга запомніцца ўсім удзельнікам, сярод якіх была і наша юная зямлячка Святлана Пархоменка.

Н. ХОДАС, намеснік дырэктара па вучэбнай рабоце Судкоўскай СШ.