КРЫМІНАЛЬНАЯ ХРОНІКА

АМАТАРЫ ФАНЕРНЫХ ЖАНЧЫН

Дзіўныя іншым разам назіраюцца схільнасці ў людзей, ды яшчэ па п’янай лавачцы. Вось, напрыклад, ніяк не змаглі пераканаўча растлумачыць свой учынак маладыя (1989 і 1992 гадоў нараджэння) работнікі аднаго з прыватных прадпрыемстваў слаўнага горада Слуцка. 24 лістапада, выканаўшы работы па рамонту мэблі ў суседнім Брагінскім раёне, трапілі яны праездам у наш горад. І прыцягнула іх увагу фанерная жанчына з дзіцём, устаноўленая ў мэтах бяспекі руху каля першай гарадской школы. Ды так прыцягнула, што проста запала, як кажуць, у сэрца: ні забыцца, ні выкінуць. Таму і вырашылі заклапочаныя хлопцы не развітвацца болей з фанернай прыгажуняй, загрузіўшы яе ў кузаў пікапа «Мерсэдэс».

Увесь гэты амаль каўказскі рытуал выкрадання нявесты ў тры гадзіны дня назірала жанчына-вартаўнік СШ № 1, якая і пазваніла ў райаддзел міліцыі. Адсачыўшы з дапамогай камер відэаназірання аўтамабіль з указанымі прыкметамі, аператыўнікі РАУС ужо на наступны дзень затрымалі слуцкіх «мачо». Зараз яны знаходзяцца ў ізалятары часовага ўтрымання і чакаюць суда. Іх дзіўныя сэксуальныя забавы кваліфікуюцца па арт. 206 Крымінальнага кодэксу як рабаўніцтва. А пагражае гэта альбо абмежаваннем волі на тэрмін да 5 гадоў, альбо пазбаўленнем яе на тэрмін ад 2 да 6 гадоў. Дарэчы, адзін з гэтых аматараў фанерных жанчын у чэрвені гэтага года ўжо прыцягваўся да адказнасці па гэтаму самаму артыкулу, і тады суд палічыў магчымым пакінуць яго на волі. Зараз жа тэрмін ён атрымае адназначна.

«ДЗЕ ЎЗЯЎ?.. ЗНАЙШОЎ…»
Не змог растлумачыць паходжанне 23 тон металалому вадзіцель грузавіка МАN з Бранскай вобласці суседняй Расіі, якога ўдалося затрымаць дзякуючы зладжаным дзеянням супрацоўнікаў ДАІ і крымінальнага вышуку Хойніцкага РАУС. Адзінае, што ўдалося высветліць, гэта тое, што нарыхтаваў усю гэтую жалезную гору адзін з хойніцкіх прыватных прадпрымальнікаў, не маючы адпаведнага дазволу на падобную дзейнасць.
Металічны лом канфіскаваны ў даход дзяржавы, адпаведныя дакументы накіраваны ў інспекцыю па падатках і зборах па Хойніцкаму раёну.

БЫВАЙ, «ЛАСТАЎКА»…
24 кастрычніка ўступіла ў сілу заканадаўчая норма аб канфіскацыі транспартных сродкаў у асоб, якія на працягу года двойчы прыцягваліся да адміністрацыйнай адказнасці за кіраванне ў стане алкагольнага альбо наркатычнага ап’янення. Здавалася б, і двух месяцаў не прайшло з таго часу, а ў нашым раёне рашэння суда зараз чакаюць ажно трое аматараў язды «пад шафэ». Акрамя канфіскацыі аўтамабіляў, да вінаватых будуць прыменены і іншыя санкцыі, прадугледжаныя заканадаўствам.

А. ЛОБАН, начальнік аддзялення аховы грамадскага правапарадку і прафілактыкі РАУС.