У калектыве СШ № 3 г. Хойнікі стала добрай традыцыяй праводзіць цыкл мерапрыемстваў, прысвечаных розным навукам. На гэты раз яны былі самымі разнастайнымі і змястоўнымі ў ходзе дэкады навук.
Сярод 27 мерапрыемстваў былі інтэлектуальна-пазнавальны турнір “Зямля Беларусі – мая зямля”, пазакласнае мерапрыемства па біялогіі “Кветкі – зямной красы пачатак”, групавое спаборніцтва “Хімікі-лірыкі”, інтэлектуальны марафон і інш. Усе дзесяць дзён праводзіліся віктарыны, экскурсіі, працавалі лектарскія групы. Да таго ж вучні падрыхтавалі спецвыпуск газеты “Голас школы”, дзе змешчаны тэматычныя артыкулы і названы прозвішчы пераможцаў конкурсаў.
Актыўны ўдзел ва ўсіх мерапрыемствах прынялі і самыя малодшыя цікаўныя вучні з сектара “Ноушата”, створанага ў гэтай навучальнай установе.
Яскравым было заканчэнне дэкады навук. Адкрытае пасяджэнне навуковага таварыства вучняў “Крок у будучыню” правяла яго кіраўнік, настаўніца рускай мовы і літаратуры Наталля Іванаўна Шаціла. Пасяджэнне праходзіла ў выглядзе інсцэніроўкі з казачнай Бабай Ягой і персанажамі, якія прэзентавалі тую або іншую навуку.
Затым вучні малодшых класаў адгадвалі загадкі, атрымліваючы за правільныя адказы “медалі”. А старшакласнікі прынялі ўдзел у інтэлектуальным спаборніцтве “Разумнікі і разумніцы”. Тры каманды – “Эрудыты”, “Хімікі-лірыкі” і “Зеніт” змагаліся за званне лепшай. З адрывам у адзін бал ад “Эрудытаў” перамогу атрымалі разумніцы з каманды “Хімікі-лірыкі” (на здымку). Ім былі ўручаны дыплом і салодкі падарунак – торт.
Тэкст і фота
Наталлі ЧЭКАН.
