У нашай рэспубліцы за 6 месяцаў сёлета зарэгістравана 6 выпадкаў клешчавога энцэфаліту, у тым ліку ў Светлагорскім раёне Гомельскай вобласці ў ліпені выяўлены два выпадкі гэтага захворвання сярод жыхароў сельскай мясцовасці.
Для прадухілення ад укусу кляшчоў і магчымага заражэння клешчавым энцэфалітам і хваробай Лайма трэба захоўваць наступныя правілы:
– у час знаходжання ў лесе насіце спецыяльнае ахоўнае адзенне, максімальна закрывайце адкрытыя ўчасткі цела;
– карыстайцеся адпужваючымі сродкамі, якія наносяцца на адзенне або скуру;
– праводзьце сама- і ўзаемаагляды праз кожныя 2 гадзіны і адразу пасля выхаду з лесу з мэтай выяўлення і скідвання з адзення любых поўзаючых насякомых і кляшчоў;
– не дапускайце выпасу коз у лясной зоне на неакультураных пашах, штодзень аглядвайце жывёлу на наяўнасць кляшчоў, казінае малако ўжывайце ў ежу толькі ў кіпячоным выглядзе.
Пры выяўленні кляшча, які прысмактаўся, адразу выдаліце яго з дапамогай пятлі з баваўнянай тканіны, стэрыльнай іголкі ад аднаразовага шпрыца або пінцэта. Да і пасля выдалення кляшча скуру вакол і над месцам прысмоктвання апрацаваць любым дэзінфіцыруючым сродкам.
Пасля ўстанаўлення факта прысмоктвання кляшча трэба адразу звярнуцца за медыцынскай дапамогай у райпаліклініку для назначэння адпаведнага лячэння.
В. КРАЎЧАНКА,
в.а. галоўнага дзяржаўнага санітарнага ўрача Хойніцкага раёна.
