Па даных упраўлення сельскай гаспадаркі і харчавання райвыканкама, у сельгаспрадпрыемствах раёна сёння не хапае спецыялістаў, асабліва заатэхнічна-ветэрынарнай службы. У сваю чаргу каледжы і ВНУ аграрнага профілю адчуваюць дэфіцыт абітурыентаў. Гэта падштурхоўвае ўстановы адукацыі да рашучых дзеянняў. Праблему стараюцца вырашаць у ходзе правядзення дзён прафарыентацыі, адзін з такіх адбыўся ў раённым Доме культуры.
Знаёмства прысутных на сустрэчы школьнікаў з патэнцыяльнымі месцамі вучобы пачалося з прэзентацыі Віцебскай ветэрынарнай акадэміі, якую прадставіў намеснік дэкана біятэхналагічнага факультэта гэтай навучальнай установы У.Ф. Калганаў. Высокія стыпендыі і гарантаванае засяленне ў інтэрнат – гэта толькі частка з тых аргументаў, якімі прадстаўнік ВНУ заахвочваў моладзь.
Запрашэнне вучыцца ў Беларускай дзяржаўнай сельскагаспадарчай акадэміі адзінаццацікласнікі атрымалі ад дацэнта кафедры Т.У. Паўлавай. Госця з Горак рэкламавала навучальную ўстанову цікавай прэзентацыяй.
Выкладчыкі Рэчыцкага і Палескага аграрных каледжаў Т.М. Велікаборац і М.Ф. Півавараў пераконвалі рабят паступаць менавіта ў гэтыя навучальныя ўстановы: сярод відавочных плюсаў – тэрытарыяльная блізкасць. Да таго ж, гэта профільная адукацыя гарантуе працаўладкаванне і магчымасць далейшага навучання па спецыяльнасці ў ВНУ. Ды і студэнцкае жыццё ў каледжах не саступае па насычанасці ўніверсітэцкаму.
Дарэчы, аграрныя каледжы Гомельшчыны сёлета плануюць часткова пакрыць дэфіцыт кадраў сельскай гаспадаркі ў нашым раёне. Па размеркаванню накіравана ўжо 14 выпускнікоў Рэчыцкага аграрнага каледжа, 6 маладых спецыялістаў прыбудуць з Палескага аграрнага каледжа.
Без сумненняў, праведзенае мерапрыемства дапаможа выпускнікам вызначыцца ў сваім выбары.
Алеся ЯЧЫЧЭНКА. Фота аўтара.
