Насельніцтвам даўно заўважана, што просьба падаць Кнігу скарг (а менавіта так па-ранейшаму называюць Кнігу заўваг і прапаноў) мае сапраўды магічнае ўздзеянне: прадаўцы імгненна становяцца ветлівымі, цырульнікі перарабляюць прычоску на густ кліента, афіцыянты з падносам страў хутка спяшаюцца за столік наведвальніка… Для жыхароў Беларусі гэтая Кніга ўжо пяць гадоў з’яўляецца гарантам захавання іх спажывецкіх правоў.
Напомнім, што ў студзені 2005 года Прэзідэнт Рэспублікі Беларусь А.Р. Лукашэнка падпісаў Дэкрэт № 2 “Аб удасканальванні работы з насельніцтвам”, згодна з якім усе арганізацыі і дзяржаўныя органы павінны мець Кнігу водгукаў і прапаноў. Сёння ўжо можна сцвярджаць, што ні адна скарга, ні адна заўвага не застаюцца без увагі Камітэта дзяржаўнага кантролю, падатковых органаў, раённых выканаўчых камітэтаў. А прадастаўляецца Кніга па першаму патрабаванню жадаючага выказаць сваё незадавальненне.
ГАРТАЮЧЫ СТАРОНКІ КНІГІ
Медыцынскія паслугі займаюць асаблівае месца ў сферы спажывецкага звароту. I гэта зразумела, бо ад людзей у белых халатах залежаць наша жыццё і здароўе. Пагартаўшы Кнігу водгукаў і прапаноў, якая знаходзіцца ў прыёмнай галоўнага ўрача цэнтральнай раённай бальніцы Ю.Г. Васілевіча, пераконваешся, што хайнічане ёй давяраюць.
– Па кожнай скарзе праводзіцца дасканалае расследаванне, – гаворыць адказная за “патранаж” кнігі, сакратар прыёмнай Т.С. Іллічова (на здымку). – І магу падкрэсліць, што вядзенне кнігі спрыяльна сказваецца на рабоце медустаноў раёна. Супрацоўнікі нясуць адказнасць за свае прафесійныя памылкі і паступова іх выпраўляюць, а спажыўцам не трэба бегаць па інстанцыях, каб выказаць сваё незадавальненне: яны ўпэўнены, што іх скарга дойдзе да патрэбных людзей, прычым у самы бліжэйшы час.
Гэта ўжо другая Кніга заўваг і прапаноў, якая “дзейнічае” з дня падпісання Дэкрэта № 2 Прэзідэнта. Усяго на сённяшні дзень запісана тут 57 заўваг і прапаноў.
…Адна з пацыентак скардзілася, што на працягу месяца не можа зрабіць рэнтген зуба. Заяўніцы было паведамлена, што ў наяўнасці не было рэнтгеналагічнай плёнкі, да таго ж, на той час гэта была праблема нават для ўстаноў г. Гомеля. I калі плёнка з’явілася, паслуга была аказана.
Маці непаўналетняй дзяўчынкі з вёскі Судкова скардзілася на мясцовага медыка на тое, што пасля прыёму школьніцы па прычыне боляў у жываце не паведаміла аб гэтым бацькам і не выклікала “хуткую”. Дзяўчынка была дастаўлена ў райбальніцу на ўласным транспарце, дзе ёй у той жа дзень была зроблена аперацыя па апендыцыту.
За дапушчэнне падобнага факта медыку загадам галоўнага ўрача ЦРБ аб’яўлена вымова, з сельскімі медыцынскімі работнікамі праведзена адпаведная вучоба.
Таксама вымова вынесена ўрачу-стаматолагу, на якога паскардзілася жыхарка Брагінскага раёна: прыняўшы пацыентку ў першы раз па прычыне лячэння зуба, медык адмовілася гэта зрабіць у назначаны дзень, калі жанчына з’явілася на прыём.
Усе скаргі аналізуюцца пастаянна – хутчэй пацыент тут граматны і ведаючы свае правы. У тым ліку празмерна ведаючы і “пакачаць” іх, дзе трэба і не трэба. Як, напрыклад, сын аднаго з пацыентаў пакінуў у кнізе запіс аб тым, што яго бацьку зроблена выдаленне пярсцёнка з пальца без анестэзіі. Сам жа пацыент якасцю паслугі задаволены. Або яшчэ, калі пацыентка выказвала незадавальненне назначаным лячэннем, а потым жа пакідае падзячны водгук пасля знаходжання ў бальніцы таму ж медыку.
Але ўсё ж больш паступае ў адрас медыкаў удзячнасцей за кваліфікаванае лячэнне, культурнае і ветлівае абслугоўванне. Падзяка ў Кнігу заўваг і прапаноў не заносіцца. Каб данесці яе, пацыент павінен напісаць заяву на імя галоўнага ўрача. I кожная падзяка можа стаць нагодай для налічэння прэміі стараннаму працаўніку.
– Калі медык атрымлівае дзве пісьмовыя падзякі, у тым ліку змешчаныя і ў сродках масавай інфармацыі, яму належыць прэмія ў памеры адной базавай велічыні, – расказвае намеснік галоўнага ўрача Т.У. Хаванская. – Прычым заахвочваюцца не толькі асобныя медыкі, а нават цэлыя калектывы. Вельмі прыемна, што праца нашых медыкаў шануецца. Так, зусім нядаўна паступіла падзяка ўрачу С.В. Барысенка з Міністэрства аховы здароўя Рэспублікі Беларусь пры Прэзідэнце Рэспублікі Беларусь, куды звяртаўся яе пацыент. Медык атрымала прэмію ў памеры трох базавых велічынь.
ЗВАРОТНАЯ СУВЯЗЬ
Сапраўды, як толькі ў Кнізе заўваг і прапаноў з’яўляецца новы запіс, галоўны ўрач цэнтральнай раённай бальніцы Ю.Г. Васілевіч разглядвае скаргу на працягу 15 дзён. А чалавек, які напісаў скаргу, атрымлівае пісьмовы адказ з указаннем прынятых па яго заўвазе мер. Менавіта таму кожнаму жадаючаму пакінуць след у гэтай кнізе прапаноўваецца ўказаць, акрамя самой скаргі, яшчэ і сваё імя і прозвішча, адрас і тэлефон. Ананімныя заўвагі таксама разглядваюцца, але іх аўтар наўрад ці зможа даведацца, што зроблена дзеля абароны яго інтарэсаў. Звесткі аб разглядзе скаргі і накіраванні адказу таксама заносяцца ў кнігу. Разглядваюцца толькі тыя заўвагі, якія датычаць непасрэдна працы медыкаў.
ЛЮСТЭРКА РАБОТЫ
– Кніга заўваг і прапаноў дапамагае спажыўцам весці канструктыўны дыялог з кіраўнікамі прадпрыемстваў і арганізацый пры канфліктных сітуацыях, – гаворыць вядучы спецыяліст аддзела эканомікі райвыканкома, які займаецца пытаннямі па ахове правоў спажыўцоў Н.В. Прыходзька. – Кожны экземпляр выдаецца і рэгіструецца ў падатковай інспекцыі. Існуюць правілы вядзення Кнігі, яе выдачы і рэагавання на заўвагі. Калі на працягу года прадпрыемства тройчы парушае гэтыя правілы і падвяргаецца адміністрацыйнаму спагнанню, то выносіцца рашэнне аб прыпыненні яго дзейнасці тэрмінам да шасці месяцаў. Бывае, што Кнігу скарг не хочуць выдаваць ні па першаму патрабаванню, ні па дзесятаму. У такім выпадку трэба выклікаць міліцыю або пісьмова звярнуцца ў адміністрацыю раёна.
Калі вы вырашылі напісаць заўвагу, то абавязкова трэба звярнуць увагу на першую старонку кнігі, дзе павінна быць пячатка падатковага органа, нумар, назва і адрас прадпрыемства. I на працягу 15 дзён чакайце пісьмовага адказу. Незахаванне хаця б аднаго з названых правіл ужо з’яўляецца парушэннем, і, адпаведна, прычынай для ўзбуджэння адміністрацыйнага працэсу.
Кніга заўваг і прапаноў з’яўляецца люстэркам працы прадпрыемства: чым вышэй прафесійны і маральны ўзровень супрацоўнікаў, тым менш будзе крытычных водгукаў. I яшчэ гэта цывілізаваны шлях вырашэння канфлікту паміж спажыўцамі і прадаўцамі тавараў і паслуг, бо не трэба нават павышаць голас, даказваючы сваю правату. Ваш канфлікт вырашыцца ў адпаведнасці з беларускімі законамі.
Клаўдзія БОСАК.
